我阿爸係凶手（上）
阿爸。
自從佢移民後，呢個稱呼已經離我好遙遠。
呢一次，再收到佢嘅消息，就係佢嘅死訊。
我唔算太意外，畢竟人終需一死，佢都年過九十，算係壽終正寢。
我飛去阿爸所在嘅城市，處理佢嘅後事，收拾佢嘅遺物。
突然間，我發現咗一張女人嘅相，相中嘅女人微微瞇住眼，有一種既冷漠又魅惑嘅矛盾。
阿爸生性風流，結過五次婚，女友更加係多不勝數，有幾多張女人相都唔出奇。
但我心裡有一種怪異嘅感覺，忍唔住拎起張相再睇，女人戴住一個別緻嘅頭飾。
我忽然諗起一個人，上網搜索佢嘅名，果然……相中嘅女人，係莫麗。
莫麗，曾經係一個靚女，出身貧寒嘅佢，希望憑自己嘅美貌，獲得名氣，獲得更好嘅生活。
佢成日喺電影城，希望被星探發掘，或者係運氣唔好，或者係佢根本無咁靚，
總之佢無被發掘，反而為咗生活，開始周旋於唔同嘅男人之間。
折騰咗一年，莫麗失望啦，佢唔再幻想成名，佢決定返鄉下過平靜嘅生活。
一個星期後，莫麗一夕成名－以最可怕、最殘酷嘅姿態。
一具女屍喺草叢被發現，屍體攔腰折斷，全身多數受傷，子宮消失。
最詭異嘅係，佢嘴角被割開，直到耳仔邊，似一個大笑的小醜。
經過驗屍，證實屍體屬於莫麗，更證實佢死前被折磨超過40個鐘，不過無受到性侵犯。
佢嘅身體，好可能係活著嘅時候被斬斷。
囂張嘅凶手，寫咗封信寄去警局，更附上莫麗嘅隨身物品。
但哪怕有咁多資料，依然捉唔到凶手。
狡猾嘅凶手，看似提供咗好多線索，其實隱藏晒所有關於自己嘅證據。
而且，呢單案發生喺四十年前，當年嘅鑒證科技亦無咁發達。
呢宗懸案，亦被稱為呢個城市最駭人聽聞嘅慘案，不時被人提及。
我當年亦係報紙上睇過佢嘅相，仲同朋友討論過，凶手係咩人。
我哋都無諗出咩專業嘢，來來去去都係嗰幾個推斷。
一，報紙話凶手切割屍體嘅手法好專業，對人體器官好了解，凶手可能係醫生，或者受過相關訓練。
二，凶手唔圖財唔圖色，亦無其他類似嘅案件，唔似連環殺手，好可能係針對莫麗嘅情殺案。
呢啲推斷人人都識講，當年查案嗰陣，已經儘量查晒同莫麗有關係嘅男人，都無搵到咩線索。
但呢一刻，我昇起一個古怪嘅念頭。
我仔細翻查阿爸嘅遺物，佢唔係一個鍾意收藏留念嘅人，連自己嘅相都無幾多張，居然特登收藏咗一張莫麗嘅相。
加上阿爸生性風流，我唔信，佢同莫麗毫無關係。
本來，「有關係」同「係凶手」，係兩樣嘢嚟嘅，但我朝呢個方向諗落去，細思極恐。
阿爸退休前，係一個外科醫生，佢有切割屍體嘅專業知識。
而且，凶案發生後無幾耐，阿爸就移咗民，佢嘅移民都係莫名其妙，會唔會係為咗逃避追查？
再諗番阿爸嘅性格，佢佔有慾好強，佢同阿媽一齊嗰陣，阿媽同男人講多句嘢，佢返屋企都會鬧阿媽一餐。
雖然佢風流，但佢只會背叛人，唔容許人哋先背叛佢。
我愈諗愈覺得阿爸似凶手，嗰晚我完全瞓唔著，一合埋眼，就會諗起莫麗個樣。
我開始查呢單案，我嘅證據都係猜測居多，我需要更實質嘅證據。
我發現，案發後，阿爸曾經去過錄口供，原來佢都係莫麗嘅入幕之賓之一，佢份口供當然無咩特別。
我搵咗好多朋友幫手，駛咗好多錢，搵到當年凶手寄去警局嘅信，請埋筆跡專家比對。
結果，阿爸嘅筆跡，同凶手嘅信，有超過80%嘅相似。
種種證據，加埋我對阿爸嘅了解，我相信，阿爸就係凶手。
我甚至想像到阿爸嘅心路歷程，佢愛上莫麗，但莫麗無被佢迷倒，反而繼續同其他男人周旋。
阿爸本來就妒火中燒，呢個時候，莫麗居然準備返鄉下，離佢而去。
本住「我得唔到，都唔可以畀其他人得到」嘅心態，阿爸約咗莫麗出嚟，將佢虐殺。
下集：https://bit.ly/2BP4q9Z
將專頁設定為「搶先看」/ "See first"，最新故仔馬上睇！
做兵不如養隻狗：https://goo.gl/PsWkRJ
阿媽失蹤後：http://bit.do/fiarL
#短故 #短篇 #小說 #陳美濤 #廣東話 #粵語 #tomatochan #我阿爸係凶手
Search